اسرار لا تعرفها عن تقدم لوظيفة

حسب المشاكل الباحثين عن الشغل و الخريجين الجداد, حابب اناقش معاكم أهم المواضيع للباحثين عن العمل, سواء كنت عاطل عن العمل او حابب تغير الشركة اللي انت بتشتغل فيها.
كل اسبوع رح انزل مقال بسيط لحتي اناقش اهم المواضيع و المشاكل اللي بتواجه الباحثين عن العمل.
نبدأ من نقطة البداية و هي التقديم لوظيفة معينة في شركة و بالاخر أزودكم بنصائح مهمة لتقديم طلبات التوظيف.

التقديم لوظيفة قرأت عنها هي دائما أول خطوة لبداية حياة مهنية عملية, و طبعا انا ك موظف موارد بشرية لاحدى شركات ال IT في الأردن و افرعنا فباقي الدول, مسؤول عن المقابلات للوظائف في الشركة, و من أهم المشاكل هي التالي.

·        المقدم للوظيفة غير مطابق للمطلوب, كيف يعني ؟ بسيطة!!!
يعني الاعلان بيحكي .Net Developer بيجي محاسب بيبعت السي في لهدف الملاحظة.

·        المقدم للوظيفة لا يمتلك الخبرات المطلوبة, دائما في امور تقنية مطلوبة بالوظيفة, اذا انت/انتي ما عندك هاي المهارات و ما اشتغلت فيها ب شغلك الحالي اعرف تلقائيا انه السي في غير ملائمة ومارح نحكي معك الا بحال توافرت شواغر بخبراتك.

·        الصورة الشخصية في السي في, طبعا الموضوع اختياري انك تحط صورة أو لأ, ولكن اذا حطيت صورة شخصية من المفترض انها تكون صورة شخصية مرتبة, مش ضروري تعمل وضعية أو تكون لابس نضارة شمسية. لأنه الصورة الشخصية بحال كانت موجودة (يفضل تكون موجودة) تعكس الانطباع الأولي عن السي في, وطبعا مارح نحكي مع حدا حاطط صورة سيلفي. و صدقوني في كتير ناس هيك.

·        السي في الخادعة, مصطلح منطلقه على شخص مجمع في السي في خبرات و امور تقنية, و لما نحكي معه تسأله سؤال بسيط بيحكيلك بعرفش, ما اشتغلتش فيها انا بس قرأت عنها. يعني بس تجميع كلام.

ناقشت أهم و طبعا بعض المشاكل اللي منواجهها ك موظفين موارد بشرية لأي شخص بيقدم لوظيفة, و طبعا النقاش ما بيخلص هون لأنه رح ازود ب شوية نصائح لتقديم طلبات التوظيف ممكن تساعدكم.
و أهم هاي النصائح.

·        اقرأ نص اعلان الوظيفة, سواء كان في بيت دوت كوم, اخطبوط, موقع خريج, أو حتى في الجريدة. بيكون محطوط الخبرات المطلوبة ك سنين, و الأمور التقنية.
اذا ما عندك هاي الخبرات و قدمت لوظيفة مارح يتصلوا معك, بدال التشاؤم اقرأ عن المطلوب و وسع خبرتك فيهم, وارسال السي في لمجرد الملاحظة عبارة عن تضييع وقت.

·        اذا كنت خريج جديد أو عاطل عن العمل, اعرف أهم الدورات المطلوبة في تخصصك, و شارك في أعمال تطوعية لحتى تنضاف في خبرتك و توسع معرفتك, بهاي الدورات و الأعمال التطوعية بتجذب الشركات.

·        اشترك في موقع LinkedIn هو عبارة عن موقع احترافي فيه ناس من الأردن و الخارج و دايما في اعلانات وظيفة, وكل ما زاد عدد المتابعين عندك و كل ما كان ال بروفايل مرتب كل ما جذب الأنظار لالك أكثر, انا واحد من الناس اللي اشتغلت في شركتي الحالية عن طريق موقع ال LinkedIn.

·        الصورة الشخصية خليها تكون محترفة و عملية, ما تتعاجز تتصور صورة شخصية جديدة أو حتى صورة التخريج بتزبط, المهم ما تكون متكتف و لابسلي نضارات شمسية او بين شجر و حاطط الصورة.

·        تاكد من السي في انه فيها الخبرات اللي اشتغلتها و شغلك باختصار بسيط للي كنت تشتغله في شركتك السابقة, و بالنسبة للخريجين الجداد اذا كنت في اعمال تطوعية تذكر المهمات اللي كنت تعملها و تشتغلها, و اذكر الدورات و الشهادات اللي معك بتفيدك .

6:50 ص