المقابلة لوظيفة

الموضوع رح يكون عن المقابلات, أهم المشاكل في المقابلة, الأخطاء الشائعة و كيف ممكن تخفف من التوتر قبل المقابلة.

المقابلة عبارة عن قسمين, قسم عملي و قسم شخصي.
العملي بيرتكز على خبرتك و وظيفتك و كيف كنت تشتغلها و اذا كنت خريج جديد أو بدون خبرة بس معرفة عن الأمور اللي درستها و الجوانب العملية المرتبط للوظيفة اللي انت مقدم عليها.

الشخصي بيدخل بجانب شخصيتك نفسها, أسلوبك, انطوائي أو اجتماعي, أسلوب التعامل مع ضغط الشغل, طريقة تفكيرك و طريقة ايجاد حلول ل مشاكل الشغل.
طبعا الجانب الشخصي مهم لكل شركة لانه احيانا بني ادم اسلوبه مستفز في التعامل أو اسلوبه جاي بطريقة الأمر اشي مش منيح.

طبعا بالنسبة للمشاكل اللي بتصير في المقابلة بتكون من الطرفين مش بس من اللي قدم للوظيفة, و من أهم هاي المشاكل باختصار شديد هي:

·        عدم كفء الشخص المقابل, هاي المشكلة بتكون باللي بيعمل المقابلة, ما عنده معلومات كفاية عن طبيعة الشغل, نوع الشغل, أو حتى المطلوب في الوظيفة و بالتالي اسئلته بتكون غلط ب غلط و التقييم بيكون غلط و المقابلة بتكون مضيعة وقت للطرفين.

·        عدم التحضير للمقابلة من الموظف, يعني بتيجي على المقابلة, بيحكيلك اللي بيقابل احكيلي عن حالك و ما بيدخل بجانب الأسئلة العملية لانها الأهم و بتحدد اذا الشخص كفء للوظيفة أو لأ.

·        المعاندة, لاحظت بشكل كبير انه في ناس بتعاني من موضوع انه الشخص اللي بيقابل بيعاند على طريقة معينة للحل أو على جواب محدد فقط اللي مكتوب عنده, هاذا بيدل على عدم الخبرة, عدم التحضير و عدم كفائة الشخص المقابل لحتى يعمل المقابلة, كل سؤال اله حل و كل حل اله أكثر من أسلوب, تعددت الطرق و الهدف واحد, و المعاندة هي من أسوأ الأساليب لحتى اتطلع الشخص اللي قدم للوظيفة على انه غلط.

·        موظف الموارد البشرية بيسأل أسئلة ما الها علاقة بالشخصية, طبعا ماحد بيسأل هيك أسئلة الا المبتديء, أسئلة مثل (شو هواياتك ؟) طبعا هاذ سؤال لحتى يعرف طبيعة شخصيتك بس في أسئلة ثانية بتعطيك الجواب على هذا السؤال و لا تعتبر شبه تافهة, انشالله لو بتحب صيد السلاحف أو القراءة انت حر, بس في سؤال رح أكتب جواب مثالي عليه اخر البوست وهو فعلا مهم.

مندخل على موضوع ال مقدم على الوظيفة و الأخطاء الشائعة.

·        التأخير على موعد المقابلة أو عدم الحضور بدون ابلاغ, للأسف الموضوع بصير بشكل كبير بين الناس, مافيها مشكلة اذا اتصلت بالشركة خبرتهم انك رح تتأخر بسبب شغلة, أو انك مارح تقدر تيجي على المقابلة, بالعكس بيدل على احترامك للمقابلة و للشركة و ممكن لما تصير فرصة أحسن بنفس الشركة يرجعوا يتواصلوا معك.

·        الحضور بشكل غير لائق على المقابلة, مافيها مشكلة تيجي على المقابلة ف بنطلون جينز بس يكون مرتب, مش من النوع الممزوع عند الركب أو تكون بنص المقابلة بتعلك, للأسف هاي وحدة من السلبيات الكبيرة برضه و بتصير بشكل متكرر. حتى لو كنت شاطر بتضيع على حالك فرصة الوظيفة.

·        الأسلوب, طبعا معروف عنا كشعب أردني الكشرة و الهيبة و الحمدالله كلنا فينا هاي العادة, مش مشكلة طبعا, بس برضه يكون أسلوبك تهجمي في المقابلة ؟ هذا اشي مش مقبول, الأسلوب التهجمي بيعكس طريقة تعاملك مع باقي الموظفين وهاي نقطة سلبية. كون رايق و ابتسم شوي و كون هادي في الحكي مافيها مشكلة بس مش تهجمي.

·        الوثوق في النفس, طبعا أمر جدا رائع انك تكون واثق من نفسك و من شغلك ولكن في حدود, لما تزيد عن حدها تعتبر انك مستخف بطبيعة الشغل و كل اشي الك يعتبر سهل مع اني عارف انه على أول سؤال عملي بتنسأله من تخصصك رح تصفن.

·        التوتر, أمر طبيعي انك تتوتر قبل المقابلة و تنعجق و انت بتحكي, بس التوتر برضه ممكن يضيع فرصة حصولك على الشغل, لا تتوتر اعتبر انها محادثة بينك و بين الشخص اللي قبالك عن خبرتك شو بتعرف و شو اشتغلت و اعتبر انه الأسئلة العملية سؤال قرأته من كتاب بدك تجاوب عليه, حتى لو طلبت ورقة و قلم بالعكس عادي, المهم انك توصل الفكرة الصح لو بأسلوب ثاني توصل للمطلوب.

طبعا لسا في كثير شغلات ممكن نسيت أكتبها بس بوجهة نظري هاي أهم الأخطاء اللي بتصير في المقابلات من الطرفين.
طبعا بالنسبة لموضوع الراتب مافي مشكلة اذا سألت عن الراتب بعد المقابلة بس بأسلوب جيد مش تهجمي, السؤال عن الراتب حقك و اصلا قبل نهاية المقابلة مفروض يحكولك كيف الرواتب في الشركة و على ايش بتعتمد, ويشرحولك عن الضمان الاجتماعي و التأمين الصحي.


*السؤال اللي بيعاني منه الناس هو:
وين شايف حالك بعد 3 أو 5 سنين ؟

الجواب:
بعد 3 أو 5 سنين بكون قدرت أثبت وجودي في الشركة و قدرت أنجز المطلوب مني في شغلي و بيكون وصلت لمرحلة أعلى من اللي انا بقابل فيها, سواء senior او حتى ممكن team leader .

*شو فائدة هذا السؤال ؟
هذا السؤال بيحدد طموحك الشخصي, اذا انت بتقدر تتعب على حالك و تثبت انك حابب تكبر بالشغل أو لأ, الشركة بيهمها الشخص الطموح لانه رح يشتغل و يعطي و في المقابل رح ياخذ حقه و يكبر.
و بصراحة في ناس من أول سنة أو سنتين بتكبر, و ناس بتضلها بنفس مكانها ل 5 سنين.

6:57 ص