كيف تعرف الوظيفة المناسبة للتقديم عليها

اليوم حابب أناقش موضوع كيف تعرف الوظيفة المناسبة للتقديم عليها سواء كنت باحث عن عمل أو خريج جديد. صراحة موضوع مهم و لكنه بسيط لبداية حياة مهنية جديدة تمشي عليها.

طبعا في المقال الأول ذكرنا الأخطاء في التقديم لوظيفة و طرق للانتباه, ولكن حاليا انا حابب اذكر طرق لحتى تعرف الوظيفة المناسبة لالك و كيف ممكن تحصل عليها.

·        قراءة العنوان الوظيفي "Job Title" اذا كان ملائم مع خبرتك الحالية أو يلائم مجال دراستك في الجامعة.

·        قراءة المتطلبات الوظيفية, اذا كانت مع خبرتك أو لأ, لكل شركة الها متطلبات وظيفية بتركز عليها سواء السبب انها مثلا بتشتغل على برنامج معين أو قريب من البرامج اللي كنت بتشتغل عليها و طبعا بتريحهم من فترة التدريب على البرنامج أو على الأقل تدريب على المشاريع اللي بيشتغلوا عليها فقط.

·        الانتباه على سنين الخبرة المطلوبة, طبعا مهم الانتباه على سنين الخبرة لأنه غير منطقي يكون مطلوب خبرة 3 سنين و شخص حديث التخرج يتقدم للوظيفة, السبب في طلب الخبرة عادة هو ايجاد بديل لشخص قدم استقالته أو ترفع بعمله.

·        بالنسبة الى حديثين التخرج أو خبرة سنة, اذا ما لقيت شغل مناسب مش معناها انه البلد مقطوعة شغل, بس انت بتقدم على شغل خطأ. طور نفسك بأخذ دورات مطلوبة في مجالك أو القيام بأعمال تطوعية لحتى تزيد السيرة الذاتية عندك.

·        معرفة مجال عمل الشركة عند تقديم الطلب, بحال وجدت شركة طالبة وظيفة بتناسب خبرتك افتح على موقع الشركة سواء على جوجل, او الموقع الرسمي, صفحة الفيسبوك, لينكدان أو تويتر. اقرأ عن مجال عمل الشركة و المشاريع المستلمة و تاريخ انشاء الشركة.

·        بحال كنت خريج جديد, مافي مانع تشوف اذا الشركة كبيرة أو لأ, طبعا الشركات الكبيرة عادة فيها مقابلة تقنية, راجع معلوماتك بالأمور المطلوبة للعمل واتذكرها لأنه رح يكون المطلوب أمور أساسية فقط بما انك خريج جديد.

·        بحال لقيت وظيفة بتناسب المطلوب منك و معرفتك دير بالك ترسل السيرة الذاتية بخاصية "Forward", أو انك تدرج تحت عنوان المستقل أكثر من شركة. أمر غير مقبول لأنه لكل شركة الها احترامها, و مارح تخسر اشي اذا خصصت ساعة من وقتك ترسل السيرة الذاتية لكل شركة لحال.

الموضوع قصير, بس بده تركيز لحتى تستفيد من خبرات غيرك و يصير عندك خبرة كافية تتصرف بنفسك.

5:43 ص