20 سبب يخليك تصاحب مبرمج

كثير منا عنده صحاب مبرمجين ومش عارف شو اهميتهم وليش لازم يحافظ عليهم بحياته !!

واي واحد بحكيلي مثله مثل اي واحد !!

راح احكيله المبرمج كله أخلاق وقيم ومبادئ بس بكون بحاجة انه يطلعها بطريقته وعد على ايدك يا معلم :

1 - بتلاقيه ماشي على مبدأ الـ Self invoking function ..

ما بحتاج حد يحكيله اعمل هيك وما تعمل هيك هو قد حاله وبعتمد على حاله وما بستنى حد يعمله calling ..

2 - لما تحكيله 5+5*2-11 كم الجواب ؟؟
على طول راح يعطيك الجواب 6 و ما راح يفقعك و يحكيلك 50 ..

3 - شخص مش سخيف و بزت الكلام مثل الطبل .. بتلاقيه بعرف متى يعمل "Break" و متى يعمل "Continue" ..

4 - ما عنده مبدأ " حافظ مش فاهم " لانه ببساطة ماشى بمبدأ الـ if else لو case بفكر فيها فاشلة ، بروح للـ if else و لو كل الـ cases فاشلة ، بروح في الاخر للـ Else ، دايما عنده حل و مش حافظ ..

5 - بعرف دايما يحكيلك سبب اى مشكلة مزبوط و بساعدك تحلها لانه بيطبق الـ Exception handling ..

6 - حدق وذكي و بسمع النملة من كل اشي بصير حواليه لانه "Event Listener" ..

7 - لو اخدته معاك على لعبة كرة ما في داعي تحكيله وين تروح واركض واعمل هيك بالملعب لانه راح يلعب بالكل والحكم راح يتفرج انت بس عليك تزبطله الـ loop counter زي ما بدك واترك الباقي عليه واتفرج ..

8 - بعرف يعمل مليون شغلة بنفس الوقت وبعدة طرق كمان مختلفة ببساطة لان عنده "Threading" ..

9 - ما بلبس ساعة لانه عنده Date & Time built in functions ..

10 - ما بصنف الكلام من اي شخص على انها "مجرد كلام بس" عنده الكلام انواع .. ( int .. string .. float .. boolean ) ..

11 - ممكن يكون عنده شغلة و يقدر يستخدمها بمليون استخدام
لانه بعمل overloading لكل شغلة عنده و الـ Generics ..

12 - بعرف يحفظ الاسرار كثير وكتوم للغاية لانه مجرد ما تحكيله " سر " راح يعرفه private ويعمله encapsulation ..

13 - راح يساعدك كثير بالجامعة ويعطيك تست بانك وملخصات مثل المسك لانه فاهم Abstractions و interfaces ..

14 - الذاكرة عنده مش عادية لانها متقسمة Stack & Heap ..

15 - لو ضاعت منه شغلة باي مكان مش راح يستنى حد يلاقيله اياها لانه راح تلاقيه بطبق الـ Search algorithms و بثانية بلاقيها ..

16 - واهم نقطة العروس وخذ رايه وشوف كيف بفيدك لانه بجمع Requirements ممتاز وبعمل analysis مثل الورد و كل فترة بعمل testing وراح يسال عنها و يعطيك feedback ..

17 - راح ترفع راسك فيه باي مشوار او حفلة او سهرة لانه زووووق كثير وبهتم كثير بالـ user interface ..

18 - خذه معك على اي مكان ومع اي حد ولو عالموت ذيبك وبوخذ الشكل يلي بناسب الموقف "ازعر ، لاعب حديد ، حرس شخصي" لانه عنده مبدأ الـ polymorphism ..

19 - لما تحكيله اعمل شغلة راح يظل يعملها دايما .. الا اذا غيرتله الـ condition ..

20 - نصيحة : خلي بالك وانت معاه ممكن يظل يحكي يحكي ويدخل ف infinite loop و ما تعرف تسكته الا لما تسكر الخط بوجهه وتزت التلفون من ايدك !!